Gedagte vir die dag

Dag 5 van inperking: Dinsdag 31 Maart 2020

Teks: Joh 1:9.  Die ware lig wat elke mens verlig, was aan kom na die wêreld.

Gedagte

As gevolg van ons sonde het die mens in duisternis begin leef. Slegs een persoon kon daardie duisternis deurbreek en dit was Jesus. Hy het as die Lig na hierdie wêreld gekom. As jy in hierdie tyd voel asof die donkerte jou oorval. Gaan sit by die Lig en word versterk deur Sy krag.

Gebed

Lig van die wêreld, ons het U skynende krag nodig in hierdie dae. Veral as ons oorval word met die donkerte van die groot virus. Mag ’n lig orals skyn. Mag U lig deur ons skyn.

Dag 4 van inperking: Maandag 30 Maart 2020

Teks: Johannes 1:5.  In Hom was daar lewe, en dié lewe was die lig vir die mense. Die lig skyn in die duisternis, die duisternis kon dit nie uitdoof nie. 

Gedagte

Alhoewel ons in hierdie tyd in ons huise vasgekeer voel en ’n donker  atmosfeer oor die planeet heers a.g.v.  die COVID-19 virus, ontneem dit ons nie van God wat Lig is nie.  Mag jy ondervind hoe God jou lewe in hierdie tyd van isolasie verlig.

Gebed

Almagtige God, moet u tog nie vir my skuilhou nie! Openbaar aan my dat daar by U lig is in ruil vir my duisternis; dat daar by U moed is in ruil vir my angs; hoop in ruil vir vertwyfeling; vrede in ruil vir onrus; blydskap in ruil vir hartseer; krag in ruil vir swakheid; wysheid in ruil vir verwarring; teerheid in ruil vir my ruheid. Openbaar aan my dat daar by U liefde is in ruil vir my haat en vergifnis vir my sonde; dat U daar is in ruil vir myself. Here, o Here, moet U tog nie vir my skuilhou nie (Howard Thurman, Die Groot gebedeboek).

 

Dag 3 van inperking: Sondag 29 Maart 2020

Teks: Jesaja 61:10. Die Gees van die Here my God het oor my gekom; die Here het my gesalf om ‘n blye boodskap te bring aan die mense in nood, Hy het my gestuur om dié wat moedeloos is, op te beur, om vir die gevangenes vrylating aan te kondig, vryheid vir dié wat opgesluit is, om aan te kondig dat die tyd gekom het waarop die Here genade betoon.

Gedagte

Probleme en uitdagings het ’n manier om ons in ons eie belange vas te vang. In hierdie tyd word ons egter op opnuut bewus gemaak van mense om ons se behoeftes en hoe die Here ons roep om na ander uit te reik.  Wie is die mense wat die Here vandag in jou gedagte plaas? Alhoewel ons hulle nie kan besoek nie, kan ons hulle skakel en bemoedig.

Gebed

Here, open tog my oë dat ek die nood van my naaste sal sien; maak oop my oë sodat ek hulle snikke sal hoor; maak my hart oop, sodat daar iemand sal wees wat sal kan help. Wys my waar geloof en liefde ontbreek en gebruik my om iets daarvan in hulle lewe in te dra. Ja, Here open my oë en ore en hart sodat ek vandag ‘n klein bietjie sal meewerk aan u vrede op aarde (Alan Paton, die Groot gebedeboek).

Dag 2 van inperking: Saterdag 28 Maart 2020

Teks: Jesaja 41:10  Moenie bang wees nie, Ek is by jou, moenie bekommerd wees nie, Ek is jou God. Ek versterk jou, Ek help jou, Ek hou jou vas, met my eie hand red Ek jou.

Gedagte

Wat beteken dit dat God ons in hierdie tyd van isolasie versterk? Laat die Here toe om in hierdie tyd jou gedagtes te vernuwe en bewus te maak van hoe jy ten spyte van hierdie omstandighede deur God geseën is.

Gebed

Opgestane Here, dankie vir die tydlose groet wat U ons geleer het: “Vrede vir julle!” Dankie vir die vrede wat U oor ons uitgespreek het: Die sjalom van God, die diep blywende vrede wat net van U kan kom; die vrede wat ons innerlik tot rus bring; die vrede wat ‘n mens regop kan hou wanneer die storms om jou slaan; die vrede wat ons as u kinders selfs die krag gee om ons vervolgers kalm in die oë te kyk. Here, dit is die vrede waarmee ons u Goeie Nuus met moed en vreugde kan verkondig. Omdat dit die mees unieke vrede op aarde is, vra ek dat u Gees my vandag opnuut sal vul met dié kosbare gawe, dié vrede wat broers en susters kan versoen, swart en wit, ryk en arm, jong mense en ouer garde (John Johansen-berg, Die Groot gebedeboek).

Dag 1 van inperking:  Vrydag 27 Maart 2020

Teks: Eksodus 14:14.  Bly julle maar kalm. Die Here sal vir julle veg.

Gedagte

In onseker tye soos dié is ons gedurig besig om planne te maak vir alle moontlike scenario’s wat mag afspeel. ’n Mens vra jouself gedurig af: “Is ek gereed vir dit wat moontlik kan kom?”  Wat oorheers jou gedagtes in hierdie tyd en hoe ervaar jy God se vrede wat belowe: “Wees stil en weet … ek is die Heer”?

Gebed

“Wees stil en weet: Ek is die Heer.
Ek spreek, en wind en golwe bedaar,
Ek sal ook jou getrou bewaar.

“Wees stil en weet: Ek is die Heer.
Ek ken jou pyn, jou donkerste nag.
Ek is by jou, Ek gee jou krag.

“Wees stil en weet: Ek is die Heer.
Kom bring na My jou kommer en vrees.
Ek sal vir jou ‘n toevlug wees.

“Wees stil en weet: Ek is die Heer.
Bly waak en bid; volhard in geloof.
Ek is by jou soos Ek beloof.”

(Liedboek van die Kerk, 519:1-4)